Raja, Anak ni Raja, Boru ni Raja

Goar/gelar Raja i halak Batak. ndang apala dos i tu Raja/sultan disuku/etnis na asing. Molo di halak Batak donganna tubu do goar Raja i. Sude do baoa Anak ni Raja, jala sude do daboru, Boru ni Raja. Anggo pangatusion na somal, molo Raja, na pinabangkit ma, na pinillit nirakyat, manang panggomgom. Jala di suku na asing ala ni keturunan ma i. Alai molo Kapala Nagari, Raja Ihutan, napinabangkit ni Pamarenta ma i.

Ianggo Raja Parbaringin, na jongjong sandiri do i, na tinolopan ni haha anggi na dohot dongan tubu na. Ala di goari do i Raja Bius. Ingkon paboaona do i tu dogan na Raja Bius na di luat na asing, dibagasan ulaon adat Batak dohot pesta na balga. Kapala Nagari , Raja Ihutan, Kapala Kampung, aparat ni Pemerintah do i di sada-sada luat.

Alai ianggo Raja Parbaringin, mangaradoti patik dohot uhum ma i di luat na niinganan na. Atong songon dia ma pangalaho ni sada halak Baak asa targoar jala tarjou ibana Raja?. Tarida ma i sian pangalahona dohot pambahenanna. Ai targoar ma antong ibana:

1. Raja parmahan so mantat batahi, pamuro so mantat sior
2. Paramak sobalunon, parsangkalan sora mahiang
3. Di jolo siaduon, di pudi sipaimaon, di tonga sirungguan
4. Gompul di harbangan, singa di tonga ni alaman
5. Parmangkudap sibane-bane, nalambok sigurung-gurung
6. Parbahul-bahul na bolon
7. Naso maronding-onding disitumudu, naso marholip-holip disitualang
8. Naso dompak pujion, na so tundal hataon

Angka i ma deba kriteria ni sada Raja di halak Batak, gabe targoar jala tarjou ibana siganup ari gabe Raja, asing ni Raja naung melekat hian di ibana di hasoranganna tu portibi on. Tarjou ma ibana Raja di tonga-tonga ni huta, marga dohot luat, ndada napola dilantik i, Umpamana: Raja Pontas, Raja Sotarduga, Raja Buntal, Raja Bongbongan, Raja Parluhutan, Raja Nawalu, Raja Patik, Raja Mangansal, dohot na asing. Laos ihut ma antong soripadana gabe ina na ulibasa, na Basar, napantas marroha, Porman, Toman, Donda, Parbahul-bahul na bolon songon parsonduk bolon.

Alai hita pe Raja do, Anak ni Raja do, boru ni Raja do. Ta jaga jala ta pelihara ma goar Raja i. Dohonon ni halak ma: “Sipigo ambaroba, rara huling-hulingna. Toho do ibana Raja/Anak ni Raja/Boru ni Raja, ai tung denggan do pangalaho dohot lambok pangkulingna”.