Jujur Ngolu Ni Adolf Parlaungan Sibarani (Op. Shalomita Doli)

Jujur Ngolu Ni Op. Shalomita Doli

Loloan napinarsangapan, amanta raja, inang soripada, naliat nalolo di hamu saluhutna, raja ni hula-hula, tulang rorobot nami, dohot bona tulang maradu sude hula-hula nami dohot sude saluhutna nahuparsangapi hami raja ni dongan tubu, dohot dongan sahuta.
Ia ompung naumpoppar hami ima Sintua Adonia manang Op. Johanna Sibarani mangalap boru Aruan: 3 anak, 2 boru. Marujung ngolu ma Ompung boru nami on, marhasohotan ma muse tu boru ni raja i boru Hutajulu. Dibasabasa on Tuhanta 4 baoa, 5 boru. Pungu ma sude 7 baoa, 7 boru.

• Anak I: Op. Posma mangalap boru Pasaribu. Titir maranak titir marboru, marpahompu di anak dohot boru.
• Anak II: Op. Riama mangalap boru Harahap. Titir maranak titir marboru, marpahompu di anak dohot boru.
• Anak III: Op. Winda mangalap boru Panggabean. Titir maranak titir marboru, marpahompu di anak dohot boru.
• Anak IV: Op. Ulibasa mangalap boru Pasaribu. Titir maranak titir marboru, marpahompu di anak dohot boru.
• Anak V: Op. Pretty mangalap boru Aruan. Titir maranak titir marboru, marpahompu di anak dohot boru.
• Anak VI: Op. Angga mangalap boru Hutapea.Titir maranak titir marboru, marpahompu di anak dohot boru.
• Anak VII: Op. Ramos mangalap boru Silalahi. Titir maranak titir marboru, marpahompu di anak dohot boru.

• Boru I dipahuta ma on tu marga Simanungkalit.
• Boru II dipahuta ma on tu marga Napitupulu.
• Boru III dipahuta ma on tu marga Panjaitan.
• Boru IV dipahuta ma on tu marga Hutapea.
• Boru V dipahuta ma on tu marga Pangaribuan.
• Boru VI dipahuta ma on tu marga Siagian.
• Boru VII dipahuta ma on tu marga Siahaan.

Gabe do sude namboru nami on sahat tu na marpahompu di anak dohot boru.

Op. si Riama na mangalap boru Harahap anakna 7: 5 baoa, dohot 2 boru.

• Anak I: Op. Martogi mangalap boru Hutajulu. Gabe do on maranak dohot marboru, marpahompu sian anak dohot boru.
• Anak II: Op. Miduk mangalap boru Siagian. Gabe do on maranak dohot marboru, marpahompu sian anak dohot boru.
• Anak III: Op. Shalomita mangalap boru Marbun. On ma dahahang na tapaadop adop nuaeng di jolonta.
• Anak IV: Ama ni Beatrix mangalap boru Sitanggang. Gabe do on maranak dohot marboru.
• Anak V: Ama ni Brian mangalap boru Manik. Marujung ma boru Manik dialap ma muse boru Situmeang. Gabe do maranak marboru.
• Boru I dipahuta ma on tu marga Pasaribu, gabe do marpahompu sian boru.
• Boru II dipahuta ma on tu marga Hutajulu. Gabe do maranak dohot marboru, marpahompu sian boru.

Ia dahahang on Op. ni si Juan, tubu di tanggal 27 November 1951. Marhasohotan tahun 1979 dohot Op. Juan boru Marbun-Banjarnahor sian Dolok Sanggul tubu ni nantulang nami boru Manurung dibasabasaon Tuhanta ma 5 dakdanak: 2 baoa, 3 boru.

• Anak I: Federal Marcos na mangalap boru Simarmata. Nunga sanga dipalumehon sada dakdanak boru alai pittor hatop do dialap Tuhanta, holan 3 ari do.
• Anak II: Gabriel Frans. Dang marsohotan dope ala di bagasan parsikkolaon dope anak nami on.
• Boru I: Bergha Theresia dipahuta ma on tu marga Simbolon. Dibasabasahon Tuhanta sada dakdanak baoa, ima na margoar Juan Farrel. Laos ima dipanggoarhon saonari tu dahahang on Op. ni si Juan.
• Boru II: Patricia Rosda Marthal dipahuta ma on tu marga Hehanusa, di basabasahon Tuhanta 2 dakdanak baoa.
• Boru III: Christine Natasia dipahuta ma on tu marga Butarbutar, di basabasahon Tuhanta 2 dakdanak: 1 baoa, 1 boru.

Torop ni pinompar ni dahahang on, pungu ma sude 14 halak.

Ia parsahiton ni abang on nunga hira-hira 4 taon, jala nunga mulak hulak marubat tu rumah sakit. Di tanggal 12 April 2015 masuk ma muse tu Rumah Sakit Ibnu Sina Pekanbaru ma abang on. Jala marujung ngolu ma abang on di tanggal 14 bulan 4 taon 2015 jam 00.30 hari Selasa. Tutup umur ma dahahangon 64 taon.

Amanta raja, inang soripada naliat nalolo ro di sude hamu namanghaholongi hami, asa boan hamu hami di tangiangmu, tarlumobi di inang nami Op. ni si Juan boru natininggalhon ni dahahang on ro di sude nian saluhut pinompar ni dahahang on. Asa dilehon Tuhanta hagogo on dohot pasupasu asa tumibu tarapul roha nami jala tarlumobi di anak nami si Marcos, dilehon hagabeon. Dohot dianak nami si Gabriel dipasaut sitta sitta ni rohanna jala dapotan rokkap.

Songon ni ma jujur ngolu ni dahahangon mauliate ma.

Pekanbaru, 16 April 2015